ಸಿಹಿಜೀವಿಯ ಹನಿಗಳು

 ಸವಿ ಜೀವನಕ್ಕೆ ಸಿಹಿಜೀವಿಯ ಐದು ಹನಿಗಳು

೧

ಮಾನವ 

ಸಮಾಜ ಜೀವಿ

ಸಂಘ ಜೀವಿ

ಸಂಸಾರ ಜೀವಿ

ಸಾಮರಸ್ಯದಿ ಬಾಳಿದರೆ

ಜೀವನವೇ ಸವಿ

ಸಮರಸ ತಪ್ಪಿದರೆ 

ತೊಡಬೇಕು ಕಾವಿ!!

೨

ಬದುಕ ಬಂಡಿಯ ಪಯಣ

ಸಾಗಲು ದಂಪತಿಗಳು 

ಜೋಡೆತ್ತಿನಂತೆ ಸಾಗಬೇಕು|

ಸಾಮರಸ್ಯವಿರದಿರೆ

ದಿನವೂ ಕಚ್ಚಾಟವಾದರೆ

ಅನಿಸಿಬಿಡುವುದು ಈ

ಜೀವನ ಸಾಕಪ್ಪ ಸಾಕು||

೩

ಗಂಡ ಹೆಂಡಿರ ನಡುವೆ

ಇರಬಾರದು ಮೇಲು ಕೀಳು|

ಅಹಂ ಬಿಟ್ಟು ಹೊಂದಾಣಿಕೆ

ಜೀವನ ನಡೆಸದಿದ್ದರೆ 

ತಪ್ಪದು ಗೋಳು||

೪

ಪ್ರೀತಿ ,ಸ್ನೇಹ, ಸಹಬಾಳ್ವೆ

ಇವುಗಳ ತಳಹದಿಯಲ್ಲಿ

ಐವತ್ತು ವರ್ಷಗಳ ದಾಂಪತ್ಯ

ಸವೆಸಿದ ಅಜ್ಜ ಅಜ್ಜಿಯ ಕರೆದರು

ಬಾ ಇಲ್ಲಿ ನನ್ನ ಸ್ವೀಟಿ|

ಸಾಮರಸ್ಯದ ಕೊರತೆಯಿಂದ

ಅಹಂನ ಉಗಮದಿಂದ

ಮದುವೆಯಾದ ವಾರಕ್ಕೆ

ಯುವಜೋಡಿ ಪರಸ್ಪರ

ಕೊಟ್ಟರು ಸೋಡಾ ಚೀಟಿ||

೫

ನಮ್ಮನ್ನು ಅರ್ಥ ಮಾಡಿಕೊಂಡು

ಜೊತೆಗೆ ಹೆಜ್ಜೆ ಹಾಕಿದರೆ

ಅವರೇ ಜೀವನ ಸಂಗಾತಿ|

ಅಪಾರ್ಥ, ಅಪನಂಬಿಕೆ,

ತಲೆಯೆತ್ತಿದರೆ ಆರದೇ

ಇರದು ಸಂಸಾರ ಜ್ಯೋತಿ ||

ಸಿಹಿಜೀವಿ

ಸಿ ಜಿ ವೆಂಕಟೇಶ್ವರ