ಗಜಲ್ ೭(ಹೇಗೆ ಮರೆಯಲಿ)

*ಗಜ಼ಲ್*

ಬಾಲ್ಯದ  ಲೀಲೆಗಳ ನೆನಪ ಹೇಗೆ ಮರೆಯಲಿ
ಆ ಬಂಗಾರದ ದಿನಗಳ ನೆನಪ  ಹೇಗೆ ಮರೆಯಲಿ

ಲಂಟಾನದ ಗಿಡದ ಅಂಟು ಜೇನ ಕೀಳಲು ಹೋಗಿ
ಎಂಟು ಕಡೆ ಕಚ್ಚಿಸಿಕೊಂಡರೂ ಸವಿಜೇನು ಸವಿದ ನೆನಪ ಹೇಗೆ ಮರೆಯಲಿ

ಸಲಿಲದಲಿ  ಗೆಳಯರೊಡನೆ ಈಜಾಡಿ
ಕದ್ದು  ಮಾವು ತಿಂದಾಗ ಸಿಟ್ಟಾದ  ಗೌಡರ ಪ್ರತಾಪ ಹೇಗೆ ಮರೆಯಲಿ

ಓತಿಕ್ಯಾತ ಹೊಡೆದು ಬಾಯಲಿ ಕಾಸಿಟ್ಟು
ಕಾಸು ಸಿಗುವುದೆಂದು ಹುಡುಕಿಹೊರಟ ಸವಿ ನೆನಪ ಹೇಗ ಮರೆಯಲಿ

ಬಣ್ಣದಲಿ ಕಪ್ಪಿದ್ದರೂ ಕಣ್ಣುಗಳಲೇ ಆಕರ್ಷಿಸಿದ
ಸುಲೋಚನೆಯ ಜೊತೆಯ ಸಲ್ಲಾಪ ಹೇಗೆ ಮರೆಯಲಿ

ಕೆರೆಯಮಣ್ಣಿನಿಂದ ಗಣಪನ ಮಾಡಿ ಪೂಜಿಸಿ
ಸೀಜೀವಿ ಜೊತೆ ಮೆರವಣಿಗೆ ಮಾಡಿದ ಭಕ್ತಿ  ನೆನಪ ಹೇಗೆ ಮರೆಯಲಿ

*ಸಿ.ಜಿ.ವೆಂಕಟೇಶ್ವರ*
*ಗೌರಿಬಿದನೂರು*