*ನೀರಿರದ ಮೀನು*
ಕವನ
ಒಲವಿನ ಉಡುಗೊರೆ
ನೀಡಲು ಕಾದಿಹೆನು
ಚೆಲುವಿನ ಗೆಳತಿಯ
ನೋಡಲು ನಿಂದಿಹೆನು||
ನನ್ನ ಬಾಳ ಹಾಡಿನ
ಪಲ್ಲವಿ ಅವಳು
ಅವಳನೇ ಜಪಿಸುವೆನು
ಉಸಿರುಸಿರಲೂ||
ಅವಳಿಲ್ಲದೆ ನಾನು
ಧಗ ಧಗಿಸುವ ಇಳೆ
ಬರುವಳು ತಂಪಾಗಿಸಲು
ಅವಳೇ ಮಳೆ||
ವಿಶಾಲತೆಗೆ ಹೆಸರೇ ಅವಳು
ಅದೋ ನೋಡಲ್ಲಿ ಬಾನು
ಅವಳಿರದಿರೆ ನಾನು
ನೀರಿರದ ಮೀನು||
*ಸಿಹಿಜೀವಿ*
ಸಿ ಜಿ ವೆಂಕಟೇಶ್ವರ
*ಕರೋನಾ ಮೀಸಲಾತಿ*
ಸರ್ಕಾರದ ಮೇಲೆ
ಒತ್ತಡ ಹಾಕುತಾ
ಮೀಸಲು ಕೇಳಲು
ಪ್ರತಿಭಟನೆ ಮಾಡುತಿಹವು
ದಿನಕ್ಕೊಂದು ಜಾತಿ|
ನಾವು ಮೈಮರೆತರೆ
ಯಾರನ್ನೂ ಕೇಳದೆ
ಕೊರೋನಾ ತೆಗೆದುಕೊಳ್ಳಲಿದೆ
ಅತಿ ಹೆಚ್ಚು ಮೀಸಲಾತಿ||
*ಗಜಲ್*
ಹನಿ ಹನಿ ಇಬ್ಬನಿಯ ನೋಡುವುದೇ ಸಂಭ್ರಮ|
ಸ್ವರ ಸ್ವರ ಬೆರೆಸಿ ಹಾಡುವುದೇ ಸಂಭ್ರಮ||
ಕಷ್ಟ ಕೋಟಲೆಗಳು ನೂರಾರು ಅನ್ನದಾತಗೆ|
ಕೊನೆಗವನು ಸುಗ್ಗಿಯ ಮಾಡುವುದೇ ಸಂಭ್ರಮ ||
ನವಮಾಸ ಹೊತ್ತು ನೋವ ಅನುಭವಿಸುವಳು ತಾಯಿ|
ಕಂದನು ಅಂಗಾಲಲಿ ಜಾಡಿಸಿ ಕಾಡುವುದೇ ಸಂಭ್ರಮ||
ಎಷ್ಟೇ ಕಡೆದರೂ ಶಿಲ್ಪವಾಗಲಿಲ್ಲ ಎಂಬ ಕೊರಗು ಗುರುಗಳಿಗೆ |
ಶಿಷ್ಯರ ಸಾಧನೆಯ ಕಂಡು ಹೆಮ್ಮೆ ಪಡುವುದೇ ಸಂಭ್ರಮ||
ವಿರಹದ ಬೇಗೆಯಲಿ ಸುಡುತಿಹಳು ಪ್ರಿಯಸಖಿ|
ಏನೇ ಆದರೂ ಸಿಹಿಜೀವಿಯ ಕೂಡುವುದೇ ಸಂಭ್ರಮ||
*ಸಿಹಿಜೀವಿ*
ಸಿ ಜಿ ವೆಂಕಟೇಶ್ವರ
ನಾನು ನನ್ನಮ್ಮನ ಕುಡಿ
ಕಲಿಸಿದಳು ನನಗೆ ಹೊನ್ನುಡಿ
ಅದೇ ನನ್ನ ತಾಯ್ನುಡಿ
(ಇಂದು ವಿಶ್ವ ಮಾತೃಭಾಷಾದಿನ )
