ಸಾಲದರೆಡು ಕಣ್ಣು (ಕವನ)

*ಸಾಲದರೆಡು ಕಣ್ಣು*

ಭುವಿಯಲಿ ಬ್ರಹ್ಮನ  ಸೃಷ್ಟಿಯ

ಸೌಂದರ್ಯವೇ  ಈ ಹೆಣ್ಣು

ಮೂಗುತಿ ಧರಿಸಿದ ಅವಳ

ನೋಡಲು ಸಾಲದೆರಡು ಕಣ್ಣು.

ಧರಿಸಿ  ಬಂದರೆ ಯುವತಿಯರು

ಚಿನ್ನ, ಬೆಳ್ಳಿ ,ವಜ್ರದ  ನತ್ತು

ನೋಡುವ ಸೌಂದರ್ಯೋಪಾಸಕರಿಗೆ 

ಕಳೆದು ಹೋದದ್ದೆ ಗೊತ್ತಾಗೊಲ್ಲ ಹೊತ್ತು. 

ಕಾಲ್ಬೆರಳಿಗೆ ಹಾಕಿದ ಕಾಲುಂಗುರ

ಮುತ್ತೈದೆಯರ ಪಾಲಿಗೆ ಸೌಭಾಗ್ಯ

ನೀರೆಯರ ಕಾಲ್ಬೆರಳ ಅಲಂಕರಿಸಿದ

ಕಾಲುಂಗುರದ ಭಾಗ್ಯವೋ ಭಾಗ್ಯ.

ಕಾಲಂದುಗೆಯ ಧರಿಸಿ ಘಲ್ ಘಲ್

ಸದ್ದು ಮಾಡಿ ನಾರಿ ಬಂದರೆ ಬೀದಿಯಲಿ

ಸಂಗೀತದ ಸರಿಗಮಗಳು ಉಲಿದಂತೆ

ಭಾಸವಾಗುವುದು ನಮ್ಮ ಕಿವಿಗಳಲಿ.

*ಸಿಹಿಜೀವಿ*

ಸಿ ಜಿ ವೆಂಕಟೇಶ್ವರ