ಯಾವ ಮಾಯೆ? (ಕವನ)

*ಯಾವ ಮಾಯೆ*


ಹುಟ್ಟುವಾಗ ವಿಶ್ವಮಾನವನಾಗಿ
ಬೆಳೆಯುತ ಸಂಕುಚಿತನಾಗಿ
ಬಂದಿಯಾಗುವಿಯೆಲ್ಲ
ಇದು ಯಾವ ಮಾಯೆ?

ಜಾತನಾದಾಗ ಜಾತಿಯ ಹಂಗಿಲ್ಲ
ಬೆಳೆದು ಜಾತಿವಿಷವರ್ತುಲದಿ ಸಿಲುಕಿ
ಜಗಳಗಂಟನಾಗಿ ಬದಲಾಗುವೆ
ಇದು ಯಾವ ಮಾಯೆ?

ಪ್ರಕೃತಿಯಲಿ ಹುಟ್ಟಿ ಬೆಳೆದು
ವಿಕೃತಿಯ ವಿಕಾರ ತೋರುವೆ
ಸಂಸ್ಕೃತಿ ಮರೆತು ಅನಾಗರಿಕನಾದೆ
ಇದು ಯಾವ ಮಾಯೆ?

ಬಡವ ಬಲ್ಲಿದ ಧನಿಕರ ಜೀವನ
ಮೇಲು ಕೀಳಿನ ಆಡಂಬರ
ಕೊನೆಗೆ ಸೇರುವುದು ಮಣ್ಣ
ಇದು ಯಾವ ಮಾಯೆ?

ಮುಗ್ಧ ಮಗುವಿನ ಮನಸು
ಕ್ರಮೇಣ ಆಯಿತು ಹೊಲಸು
ಮನವು ನಿಯಂತ್ರಣವಿಲ್ಲ
ಇದು ಯಾವ ಮಾಯೆ?

*ಸಿ.ಜಿ.ವೆಂಕಟೇಶ್ವರ*
*ಗೌರಿಬಿದನೂರು*